اتلخبطت وكنت هكتب بدل 2007 1986 ... تاريخ ميلادى :D
ميلادى ؟؟ هو ميلاد الانسان بيبقى يوم ما اتولد بجد ؟ !! اه والله
بيتكتب كده فى السى فى بتاع الشغل
فعلا لما بتيجى تشتغل بيتكتب يوم ميلادك اللى نزلت فيه من بطن امك تعيط
سبحان الله زى مايكون قلبك حاسس انك هتيجى الدنيا تتعب وتتمرمط فبتصرخ وتقول
سيبوووووووووووووووووووووونى .. بس على مين
هتنزل يعنى هتنزل
انا كمان نزلت .. آه والله امال بكتب ازاى دلوقتى
نزلت منكرش بس اللى متاكده منه
إنى لسه متولدتش
مهو البنى آدم بيتولد يوم مايحس انه لقى نفسه وانه سعيد
طب يعنى ايه بنى آدم سعيد؟؟؟
عمى انيس منصور قالك ايه
" الــســـعادة فى ان يكون ليدك ماتعمله ومن تحبه وشيىء تتمنى تحقيقه "
والله الراجل ده دماغه عاليه اوى اوى شوفتو ال 3 حاجات وواخدين بالكو من الترتيب بتاعها
إذا واحده من الحاجات التلاته دى نقصت تبقى عيشتك ملهاش طعم وتبقى انسان مش سعيد تبقى مجرد انسان يحي وخلاص
ده بأستثناء نوعين من البشر
الشخص العملى اللى العواطف عنده ملهاش مكان فى الحاله دى ممكن اعدل جملة استاذى انيس واخلى مقومات السعاده حاجتين بس الاولى والاخيره واستثنى اللى فى النص
النوع التانى من البشر هو الانسان الغير طموح الراضى بكل شيىء فى نفسه وعن كل شيىء فى الحاله دى هنستثنى آخر حاجه ونكتفى باول حاجتين وتبقى دى مقومات ساعدة النوع ده من البشر
أما الناس العاديه اللى زى اغلبنا زيى وزيك واغلب الناس فالتلاته لا غنى عنهم
أنا بالنسبالى لاقيت اللى فى النص اللى هى رقم اتنين وتقريبا رقم 3 وان كانت معالمها مش واضحه ولكن ضايع منى رقم واحد
ضايع منى رقم واحد ومضيعانى معاها ادعولى الاقيها عشان الاقى نفسى
ناس تانيه قالو السعادة فى الرضا
ونعمه بالله محدش يقدر يعترض بس الرضا معناها انى ارضى بحالى واقول ربنا عايز كده ومزعلش لما حلم من احلامى يروح او يتاجل وانا اكون مشتقاله ؟؟ اكيد لازم ارضى بس اللى مقتنعه بيه جدا انى راضيه يارب بكل اللى تجيبه بس لازم احاول انا بردو من ناحيتى عشان احقق اللى بتمناه ومنكسرش بسرعه ولا من اول مره ودى طبيعنى بس المشكله اكبر من كده واكبر من الصدمه و الانكسار
المشكله دلوقتى فى انى مش عارفه المفروض انى ابتدى منين عشان تبتدى معركتى مع محاولة تغير الواقع اللى عايشاه دلوقتى
ابتدى منين وازاى ؟ واضحى بأيه واتمسك بأيه
طبعا محدش فاهم حاجه بس ده كلام كان جوايا وكنت هطق اذا متكلمتش
دى اول مره اسجل احساس بمر بيه على بلوجى العزيز
انا بعتذر عن غيابى الفتره اللى جايه مش هتشوفونى لانى بمر بأسوأ حالة نفسيه ممكن أمر بيها فى حياتى كلها
ادعولى فى رحلتى فى البحث عن رقم واحد "1"
هرجعلكو لما الاقيها وهرجع ببوست قوى كله تفاؤل وامل وحب للحياة
قال تعالى " أنا عند ظن عبدى بى " وانا أملى وثقتى فى الله ملهاش حدود
اشوفكم على خير
30 comments:
اولا كل سنة و انتي طيبة
و عقبال ميت سنة
من الاول كنت حاسس ان احنا برج واحد برج العقرب
اما عن رحله البحث عن العنصر الاول فهي لا تستحق الغياب
انتي بيننا لاننا جميعا نبحث عن العنصر الاول
و على العموم انا لسة ببحث عن الثلاثة عناصر
يعني انتي احسن حالا
و كويس اني حجزت اول تعليق
ازيك يا دينا
كل سنة وانت طيبة
انا كمان بيجيلى اكتاب فى عيد ميلادى دايما لانى بعمل زيك واقعد احاسب نفسى
بس يا ستى نفضى
ولا يهمك
بكرة تروق وتحلا
وعشان خاطر عيد ميلادك
انا رديت على التاج بتاعك
هتلاقيه عندى فى المدونة
اه صحيح يا دينا
انت تميتى كام سنة؟؟
وانت طيب ياشمس بس انا معرفش مين طلع اشاعة ان عيد ميلادى جه :D
تقريبا انت افتكرت ان اليوم بتاع البوست هو يوم ميلادى
عموما كل سنه وانت طيب وربنا يوفقك وتلاقى ال 3 حاجات ان شاء الله
نورتينى ياشاهى بجد وميرسى اوى انا قريت التاج عندك واجاباتك جميله فعلا
انا ياستى لسه هتم 21 ان شاء الله يوم 20 الشهر الجاى "بس متقوليش لحد بقى "
:D
فعلا كل انسان بتجيله الحاله دى وربنا يسهل وتعدى على طول
ميرسى على تشريفك ومستنيه الموضوع الجديد اللى قلتى عليه لما تفضى ان شاء الله لانى بجد بحب اقرالك اوى
سلام
ربنا يخليكى يا دينا
على فكرة المدونين من وقت لتانى بيجتمعوا ويقعدوا مع بعض
نتناقش ونشوف حال البلد والناس واحنا نقدر نساعد بايه
لو تحبى تيجى معانا قعدة من دول قوليلى وانا ارتبها معاكى ونشوف بعض
Welcome to the club
:))
شدى كرسى و تعالى جنبى
والنبى يا أووووختى يا ملينا الا بعضينا
هيه فره و دايره ف البلد ولا اية؟
@ simple girl... simple dream
اكيد طبعا احب ويشرفنى انى اتعرف عليكى وعلى الناس الجامده اللى بقرالهم
وممكن تبعتيلى على ايميلى اللى فى البروفايل
نورتينى
@ saso
ايه يابنتى انتى شاربه حاجه ولا ايه
هههههههههههه
هى ايه دى اللى فره بالظبط مش واخده بالى انا شكلى مش معاكى على الخط انهارده
عموما اكيد هشد كرسى واجى جنبك عشان احب اتعرف عليك ياقمر انت
سلام ياجميل ومبروك البوست الجديد
خالتك فرنسا بتدعيلك من كل قلبها تلاقى رقم واحد
خالتى فرنسا منورة والله ويارب متحرمش من زيارتك ليا انتى انسانه جميله اوى بجد
يارب يستجيب لدعائك احسن انا فربت يجيلى احباط مزمن
نورتينى
ربنا يصلحك الامور .. ويزيح عنك كل هم...
ويوفقك الى ما يحبه ويرضى...
امين يا رب
طبعا انت بعد كده يا ست دينا سنك هيقف عند 21 سنة
ويمكن يقل كمان
مراتي بقالها 10 سنين سنها ما بيزدش
الظاهر الزمن بيتوقف عند الستات
كل 21 سنة وانت طيبة
ويارب طول عمر وحسن عمل
وبلالين وطراطير وزمامير
ابقي هاتي معاك حصان وانت جاية عندنا
@ osama
نورتنى يا اسمامه وربنا يستجيب لدعائك والله محتاجه الادعيه دى من كل الناس اوى
على فكره بلوجك حلو اوى واسمه جميل
@عيل مصرى
مش مصدقه بجد الباشا الكبير هنا
على فكره بالنسبه لموضوع السن ده يمكن يكون صح بس للى اكبر منى بقى
:D:D
انما انا لسه شويه وبجد نفسى اوصل لسن ال 27 او ال 30 حاسه ان دول اجمل سنين ممكن الست تعيشهم عشان بتكون بقت انثى بجد انما دلوقتى انا لسه مابين واحده ست وشوية عيلة عبيطه وشويه مراهقه يعنى لسه الشخصيه ماوضحتش او اكتملت اوى
بجد فرحت بتشريفك انت راجل رائع بجد وعشت اجمل ايام كان حلمى انى اعيشها فى اجمل عصر شافته مصر
على فكره سمعت حديث للشيخ خالد الجندى فى البيت بيتك بيقول فيما معناه ان كان فيه راجل عمل كل حاجه وحشه فى حياته ومتابش قبل ما يموت ومات من غير توبه بس وهو بيموت قال لبنته احرقى جثتى ولما تبقى رماد انثريها على كل جبل شوية وحصل فعلا لكن لما جه تقريبا مش متذكره اوى حساب الملكين مش فاكره الله اعلم فسألوه ليه عملت كده قال لانى عصيت ربنا كتير ومتبتش واستحى من انى اقابله فربنا قال استحى عبدى منى فانا استحى ان اعذبه ودخل الجنه
لما سمعت الكلام ده جه فى بالى باباك مقصدش انه كان وحش بس افتكرت كلام الشيخ اللى قال انه مكانش بيصلى وياما نصحته والكلام ده حسيت - والله اعلم - انه فعلا مكانش بيصلى ومات قبل ما يبقى بيصلى بس ربنا بعتله ابن زيك مثلا يدعيله ويعمله صدقات عشان ربنا يغفرله كمان هو رباك على الخير وحب الناس ودى كلها قيم اصلا الاسلام بيحث الناس عليها وتعتبر من الايمان كمان يعنى عمل حاجات كويسه كتير كمان كان بيصل رحمه وده اللى فهمته من كلامك انه كان بيروح عند عمامك ويودهم ويروح يسال على اخواته يعنى الحمد لله فيه خير محدش يقدر ينكره عشان كده بالله عليك اعمله صدقات جاريه على اد ماتقدر وادعيله كتير وانت بتصلى لان الدعاء بيصل للميت متستغربش من كلامى بس انا بجد حبيت بابك اوى
اللى شبه انور وجدى
:D:D
تحياتى ليك
دينا عندنا عركة والدم للركب، هاتي سنجة وتعالي
لو حتحسب ده يبقا انا لسه متولدتش لانى ناقصنى انسانه احبها بجد انسانه تكمل معايه حياتى انما الباقيين لاقيهم الحمد لله
البوست هائيل وكل سنه وانتى طيبه
أنا برضه برج العقرب المنيل ده 1/11/1986 وفعلا البرج ده معقد نفسيا شوية اسأليني أنا
أنا حاسس بنفس إحساسك ده اليويمن دول
بس أنا بحاول أتغلب علي الإحساس أنا عارف إنه صعب بس بجد أنا لو ما حاولتش أتغلب علي الإحساس ده حاسس إني هنتحر قريب
ارجعي اكتبي البوست اللي في أمل من دلوقتي وماتخليش الحالة ديه تسيطر عليكي كتيييير
مستنيينك قريب
قريب أوي
كان معكم ..,
كيكوووووووو
أنا برضه برج العقرب المنيل ده 1/11/1986 وفعلا البرج ده معقد نفسيا شوية اسأليني أنا
أنا حاسس بنفس إحساسك ده اليويمن دول
بس أنا بحاول أتغلب علي الإحساس أنا عارف إنه صعب بس بجد أنا لو ما حاولتش أتغلب علي الإحساس ده حاسس إني هنتحر قريب
ارجعي اكتبي البوست اللي في أمل من دلوقتي وماتخليش الحالة ديه تسيطر عليكي كتيييير
مستنيينك قريب
قريب أوي
كان معكم ..,
كيكوووووووو
انا من زمان بقول ان السعاده في الرضا بس مش بالمعنى اللي قلتيه اللي بتقوليه ده بعتبره سلبيه ... لكن بمعنى ان الواحد يبقى عنده هدف يحاول يوصله بس مايجلوش احباط لو ماتحققش بس لازم يزعل لو مازعلش يبقى عنده لامبالاه ومش هيعمل حاجه تاني
بس لما قريت كلام عمك أنيس منصور :) فعلاً كلامه صح ... اكتشفت اني برضه ناقصلي رقم 2 رقم واحد تقدري تقولي مقدور عليها مع اني لسه ماوصلتلهاش ورقم 3 موجوده الحمد لله لكن 2 دي لأ .... واحمدي ربنا انك فاقده رقم 1 :D:D
دي بجد مقدور عليها أوي ربنا يكرمك يا دينا
ومعلش ان التعليق متأخر أويييييييي :$ اوعي تزعلي مني
@ عيل مصرى
ازيك ياعمو؟ حاضر من عينى هجيب كل الاسلحه انت وراك رجااااااااااله
@ رئيس جمهورية نفسه
اولا نورتنى فى اول زيارة
ثانيا الحمد لله انك لاقيت حاجه من التلاته وربنا يوفقك وتلاقى اللى ناقصاك يارب
ثالثا ياجدعان وربنا ما ده يوم ميلادى ولا انا برج العقرب اصلا انا قووووووووس و بين القوس ولجدى
نورتنى
@kikotalaat
وربنا وربنا كمان مره انا مابرج العقرب
انا قوس
قوس
بين القوس والجدى
يوم ميلادى فى شهر 12
نورتنى يازملكاوى
الاهلى كسب انهارده اتنين صفر
قشطه علينا
الدورى لينا ان شاء الله
@ روبى
تنورى فى اى وقت ياروبى هو انا عندى كام روبى فى الدنيا؟؟
بس رقم واحد اللى مقدور عليها دى انتى بيتهيألك بس انها مقدور عليها
بس هى فى الايام دى صعبه اوى اوى
والحمد لله انك عندك رقم تلاته وعقبال اتنين يارب
نورتينى
على فكرة يا دينا انا جاوبت على التاج و انتي برضة لسة مطولة الغياب
التدوينة جميلة .. وكلامك فيها متفائل
ولكن في آخرها قلبت ألوان
الإختلاء بالنفس مطلوب , فهو أدعى للتفكر ومحاسبة النفس , ولكنه إن زاد عن حده انقلب إلى ضده , فيصبح سببا لجلد الذات
هوني على نفسك أختي وتوكلي على الله
ومن يتوكل على الله فهو حسبه
واسألي الله أن يهديك ويرشدك لما فيه خير لك في دينك ودنياك وعاقبة أمرك
واستعيني بالله ولا تحزني .. فإن سلب منك واحدة فقد أعطاك اثنتين
أسعدتني زيارتك .. وأتمنى أن تتكرر
بالمناسبة .. مدونتك جميلة .. وصادقة
جزاك الله خيرا
أنصحك بقراءة هاتين التدوينتين .. للأخ عصفور المدينة
عصفور المدينة: عين التوازن
عصفور المدينة: عين التوازن -2
@shams
معلش ياشمس كان بقالى فترة مش بدخل البلوج ..ميرسى على سؤالك
@ وضاح
اولا نورتنى فى اول زيارة ليا وتشرفنى فى اى وقت وميرسى اوى على الكلام الجميل بتاعك
انا قريت الموضوعين فعلا مفيديين جدا جدا
جزاك الله خير
كل سنة و انتي طيبة بمناسبة العيد
و ان شاء اله السنة الجاية تكوني حقيقتي حلمك
و مستنين البوست الجديد
ها أنا أزور مدونتك الجميلة إسمحيلي أولا أن أهنئك على رقة ذوقك مدونة فعلا رائعة و تستحق الزيارة .. سأجيبك على سؤالك أنا جزائرية يا لكني أحمل لمصر في قلبي حكايات و حب لا يكتب إلا بمداد القلوب ..ثانيا القصة في البوست تكاد تكون حقيقية لكني ألونها بأحاسيس الحب و أسبح بخيالي دائما في القصص
تقبلي مروري
ياترى لسه ملقتيش رقم واحد
اتمنى من كل قلبي ان تجدي ما تبحثين عنه
أعجبني كثيرا مدى فهمك لنفسك على الاقل انت تعرفين ماذا وجدتي وماذا ينقصك
بل وكرستي رحلة بحث عن الكنز المفقود
لكي مني خالص الود
Post a Comment