Friday, August 27, 2010
Wednesday, November 14, 2007
15/11/2007 ... انت اتولدت ولا لسه؟
اتلخبطت وكنت هكتب بدل 2007 1986 ... تاريخ ميلادى :D
ميلادى ؟؟ هو ميلاد الانسان بيبقى يوم ما اتولد بجد ؟ !! اه والله
بيتكتب كده فى السى فى بتاع الشغل
فعلا لما بتيجى تشتغل بيتكتب يوم ميلادك اللى نزلت فيه من بطن امك تعيط
سبحان الله زى مايكون قلبك حاسس انك هتيجى الدنيا تتعب وتتمرمط فبتصرخ وتقول
سيبوووووووووووووووووووووونى .. بس على مين
هتنزل يعنى هتنزل
انا كمان نزلت .. آه والله امال بكتب ازاى دلوقتى
نزلت منكرش بس اللى متاكده منه
إنى لسه متولدتش
مهو البنى آدم بيتولد يوم مايحس انه لقى نفسه وانه سعيد
طب يعنى ايه بنى آدم سعيد؟؟؟
عمى انيس منصور قالك ايه
" الــســـعادة فى ان يكون ليدك ماتعمله ومن تحبه وشيىء تتمنى تحقيقه "
والله الراجل ده دماغه عاليه اوى اوى شوفتو ال 3 حاجات وواخدين بالكو من الترتيب بتاعها
إذا واحده من الحاجات التلاته دى نقصت تبقى عيشتك ملهاش طعم وتبقى انسان مش سعيد تبقى مجرد انسان يحي وخلاص
ده بأستثناء نوعين من البشر
الشخص العملى اللى العواطف عنده ملهاش مكان فى الحاله دى ممكن اعدل جملة استاذى انيس واخلى مقومات السعاده حاجتين بس الاولى والاخيره واستثنى اللى فى النص
النوع التانى من البشر هو الانسان الغير طموح الراضى بكل شيىء فى نفسه وعن كل شيىء فى الحاله دى هنستثنى آخر حاجه ونكتفى باول حاجتين وتبقى دى مقومات ساعدة النوع ده من البشر
أما الناس العاديه اللى زى اغلبنا زيى وزيك واغلب الناس فالتلاته لا غنى عنهم
أنا بالنسبالى لاقيت اللى فى النص اللى هى رقم اتنين وتقريبا رقم 3 وان كانت معالمها مش واضحه ولكن ضايع منى رقم واحد
ضايع منى رقم واحد ومضيعانى معاها ادعولى الاقيها عشان الاقى نفسى
ناس تانيه قالو السعادة فى الرضا
ونعمه بالله محدش يقدر يعترض بس الرضا معناها انى ارضى بحالى واقول ربنا عايز كده ومزعلش لما حلم من احلامى يروح او يتاجل وانا اكون مشتقاله ؟؟ اكيد لازم ارضى بس اللى مقتنعه بيه جدا انى راضيه يارب بكل اللى تجيبه بس لازم احاول انا بردو من ناحيتى عشان احقق اللى بتمناه ومنكسرش بسرعه ولا من اول مره ودى طبيعنى بس المشكله اكبر من كده واكبر من الصدمه و الانكسار
المشكله دلوقتى فى انى مش عارفه المفروض انى ابتدى منين عشان تبتدى معركتى مع محاولة تغير الواقع اللى عايشاه دلوقتى
ابتدى منين وازاى ؟ واضحى بأيه واتمسك بأيه
طبعا محدش فاهم حاجه بس ده كلام كان جوايا وكنت هطق اذا متكلمتش
دى اول مره اسجل احساس بمر بيه على بلوجى العزيز
انا بعتذر عن غيابى الفتره اللى جايه مش هتشوفونى لانى بمر بأسوأ حالة نفسيه ممكن أمر بيها فى حياتى كلها
ادعولى فى رحلتى فى البحث عن رقم واحد "1"
هرجعلكو لما الاقيها وهرجع ببوست قوى كله تفاؤل وامل وحب للحياة
قال تعالى " أنا عند ظن عبدى بى " وانا أملى وثقتى فى الله ملهاش حدود
اشوفكم على خير
Tuesday, November 6, 2007
التاج اتمررلى
التاج ده اتمررلى من بنوته كل اللى اعرفه عنها ان اسمها شمس وانها شبهى شويه ..
:D:D
مش فى الشكل طبعا لانى مشوفتهاش ولا هى تعرفنى بس اعتقد فى بعض الازواق
المهم التاج عجبنى اصلا وفوجئت بيها بتمررهولى
نبتدى
كنت طالب شاطر في المدرسة؟
اه الحمد لله بس مش متفوقه يعنى اخرى الاولى على الفصل ومثلا الخامسه على المدرسه
حظى كان حلو كنت بتحط فى فصل اصلا مافيهوش ناس شاطره فطبيعى اطلع الاولى
:D:D
ايه كانت أحب مادة ليك في المدرسة و الكلية؟
بالنسبه للمدرسة طبعا العلوم والهندسه وقصة العربى الجميله
بالنسبه للكليه فكنت بحب
Aritificial intelligence , Netwoooooooork awiiiiii , Alogorithms
أكره مادة ليك في المدرسة و الكلية؟
بالنسبه للمدرسه طبعا طبعا التاريخ والجرافيا وبالذات الجرافيه بتاعت الرياح اللى معرفش جايه منين ورايحه فين
الكليه بقى كل مواد الرياضيات وبالذات
calculs
اللى هى التفاضل والتكامل ولما اقول تفاضل وتكامل يعنى فشل يعنى سقوط فيها سنتين يعنى دكتور يسقطنى عشان 3 درجات واحلى سلام للتفاضل والتكامل
كنت عايز تطلع ايه و انت صغير؟
الاول كان حلمى انى ادخل هندسه وابقى مهندسه معماريه وبعد كده حبيت العربى وبقيت اقوى فى كتابة الشعر حبيت ادرس حاجه لغه عربيه بس بما ان كل ده محصلش ودرست فى حاسبات فمتهيألى حلمى دلوقتى انى ابقى مصممة جرافيك ومواقع ان شاء الله
أغرب حاجة اتمنيتها هي إني ابقى؟
اغرب حاجه كانت نفس الحاجه اللى اتمنتها البنوته اللى مررتلى التاج ده وهى انى ابقى سواقة تاكسى لنفس سببها
عشقى للسواقه بس متفهمش ليه يعنى مانا كان ممكن اتمنى انى اجيب عربيه بس ده كان حلمى فعلا
اسم مدونتك؟
اسمها على اسمى
dinaomer
ولماذا اخترته؟
لانى وقت ماعملتها اصلا مكونتش اعرف اى حاجه عن عالم المودنين الغريب والممتع والممل احيانا بس كنت عاملاها عشان اصحابى بتوع الكليه لما نتخرج نكتب لبعض عليها مش اكتر
هل فكرت في اغلاق مدونتك؟ و السبب
الصراحه مفكرتش لانها مكانتش فى بالى الا من قريب بس ابتديت افوقلها كده واظبطها واحب اكتب فيها
صورتك فى المدونة رمزيتها؟
هى الصوره ليها معنى كبير اوى وغالى عندى جدا
كان فيه اختبار شخصيه على موقع من المواقع والاختبار كان بالانجليزى وبيطلعلك الرد بصوره ليك مش كلام ولما عملت الاختبار طلعت الصوره دى وانبهرت بيها جدا لانى حسيت انها انا
راسها راس ورده وده شيىء عجبنى الله اعلم صح ولا غلط
فستان ازرق وده اللون اللى بعشقه بعد اللون الوردى لون بلوجى وموبايلى
رفيعه زيى وانا اعشق الرفيعيين مش لانى منهم بس بحمد ربنا بجد ان ده جسمى وبحب الرفيعين جداااااا
وفى الاخر قاعدة القعدة اللى انا ساعات بقعدها لما بكون محتاجه افكر او اهدا وهى قعدة اليوجا البسيطه
أحلى جملة قيلت لك في وصف مدونتك؟
والله مش فاكره ان حد وصفها اصلا بس اصحابى قالولى اول لما عملتها انها حلوه بس
التعليقات بالنسبة لك. أهميتها؟
مهمه جدا جدا بس لما تكون من ناس انا اتمنى ردهم عليا طبعا الباقيين يهمونى ويشرفونى بس فيه ناس ببقى مستنيه كلمه منهم بس
منهم البنوته اللى مررتلى التاج ده وناس تانيه
ما احلى بوست كتبته ضع اللينك واذكر لماذا؟
احلى بوست لسه مكتبتهوش لسه هكتبه ان كان ليا عمر ان شاء الله وهيكون عن دراسه الاستاذ نبيل فاروق عن الحب فى الكتاب المشترك لسبع من كبار الكتاب واسمه "7 الوان من الحب" وكلام الاستاذ نبيل فهمنى حاجات كتير اوى مكونتش فاهماها عن الحب
احلى مدونة قريتها؟
مدونة شمس الزناتى شدتنى جدا لانى كان بقالى كتير مشوفتش ناس كده عندها قضيه ومؤمنه بيها رجعنى لايام زمان ايام افلام الثوره والدفاع عن البلد ضد الاحتلال بس هو من فريق المظاهرات والمنشورات السريه مش من الظباظ الاحرار
كمان مدونة
منتهى الجرأه منتهى الجمال منتهى الحب للحياه
مع تحفظى عليها فى حاجات كتير بس بعشقها
المدونة وصاحبتها وهى اصلا متعرفنيش بس انا متعوده تقريبا على انى اعرف الناس من بعيد واراقبهم واحبهم من غير مايعرفونى اصلا
حتى جربو تدخلو المدونة بتاعتها واسمعو الاغنيه اللى حاطها بجد متميزه فى كل حاجه
منتهى الجرأه والرومانسيه والحب العميق الواعى المتفانى الثائر الهائج دائما
اعتقد انى اذا عرفتها عن قرب هتعلم منها حاجات كتير هتفدنى اوى فى حياتى بس هى متعرفنيش بردو
:D:D
حد قل ادبه فى التعليق وعملت ايه؟
الحمد لله لأ محصلش لانى مش بحاول اكتب اى مواضيع تستفز القارىء الوقح يعنى كلامى عام وبسيط
ايه اللى هيحصل لايميلك لما تموت؟
والله حسب اذا مت قبل خطيبى وجوزى ان شاء الله يبقى اكيد هو هيحافظ عليه عشان ذكرى منى اذا مت بعده لا قدر الله الايميل هيقع ويتنسى زى صاحبته
اديت الباسوورد قبل كده لحد؟
كتيييييييييييييييييييييييييير
:D:D
انا كنت زمان مش بفترض سوء النيه من حد خاااااالص يعنى بقول انى اذا اخدت باسوورد اى حد كبيرى افتح الماسنجر اتفرج على النيك نيمز بتاعت الناس اللى عنده وهخلع وعلى الاساس ده اديت الباسوورد بتاعتى لناس قبل كده وللاسف مطلعوش زيى وعملو بيها حاجات ضرتنى
اسمى؟
كل ده ومعرفتوش
اسمى دينا
اسم الدلع المشهوره بيه وسط اصحابى؟
بوكى او دندن او دودو او دودا لكل حد اسم بينادينى بيه
مجال دراستى؟
اللى المفروض انى خلصته هو حاسبات ومعلومات يعنى اوعى وشك هندسة كمبيوتر وبرمجه لا احبها ولا افقه فيها اى شيييييييييييىء
شخصيتك نوعها ايه؟
صعب ان حد يعرف وفيه ناس بتعيش وتموت وهى متعرفش
بس عموما كان موضوع هعمله عن الابراج مش ايمانا منى بيها اطلاقا بس كل كلام البرج بتاعى متفصل عليا ومافيهوش ولا سطر غلط ولا سطر زياده ولا سطر ناقص كأنك دكتور نفسى حلل شخصيتى وبيقولهالى
بالمناسبه انا برج القوس
برج الرومانسيه خارج نطاق الزمان والمكان
مودك ايه؟
حسب بردو يعنى اوقات احس انى عايزه افرفش واضحك وساعات احس انى محتاجه انى اتكلم كلام عقلى ومنطقى واناقش حاجه معينه مع احب الناس ليا
ساعات ابقى عايزه انزل وسط البلد ومحلات وانوار ودوشه وعالم مش بتنام والاغلب الاقينى قدام كورنيش النيل وفى منتهى سعادتى
بتعمل ايه فى وقت فراغك؟
والله متوزع مابين الكمبيوتر وله طبعا النصيب الاكبر والتليفزيون احيانا وكتبى لما اكون مشتريه كتاب جديد مش بهدا الا لما اكون قريته وخلصته
يعنى وكمان ممكن اخرج
الاكلة المفضه؟
ده سؤال بردو الناس كلها عارفه
:D:D
طبعا طبعا طبعا طبعا طبعا
البـــــــــــــــــــــيــــــــــــــــــــتـــــــــــــــــــــــــزا
وجميع انواع المعجنات والمكرونه الاسباجتى
باختصار اى اكله ايطاليه الاصل تجدنى هناك
:D:D
ملحوظه مهمه اووووووووى
تصدقو دى كمان مكتوبه فى صفات البرج بتاعى
مش قلتلكو بالملى انا
السفر بالنسبه لك؟
المتعه والحريه اللى بحس كتير انى مفتقداها
صفات اخدتها من بابا؟
اصرف ما فى الجيب ياتيك ما فى الغيب .. للاسف :)
صفات اخدتها من ماما؟
حبها للابتكار والتفكير والنظره العميقه للامور يعنى الذكاء عموما
اكتر 6 حاجات بكرهها؟
الكدب
الخيانه
الكفر بالله او الرسول
الافلام الرخمه
المصارعه
الانتظار
الشغل بالنسبه لك؟
الشغل هو تحقيق احلامى ولو البعض او الصغير منها والاحساس بذاتى كفرد وليس كمرأه
الكمبيوتر والنت بالنسبالك؟
احساس بالرفاهيه وانى دائما سوف اجد ما افعله
تمرر التاج لمين؟
امممم خلصنا
طيب امرره بقى للناس دى
روبى
"لانك قلتى انك بتحبى التاج اوى ياريت الحب ده نصه كان لـــ ... "
شمس الزناتى
"اذا وقتك يسمح ياباشا "
عايشه وخلاص
"معرفش هيوصلها ازاى بس هحاول"
حاجات ملخبطه جوايا
"ياريت اعرفك اكتر"
الشاعر
"ليك يوم يا باشا"
فيه واحد ه نفسى امررهولها بس مش فاكره بلوجها
هحاول افتكر وابقى اعدل البوست واضيفها
سلاموز بالموز
Wednesday, October 24, 2007
Quotes for love & Life
For LIFE
For LOVE
so, everyone get interested in any of this quotes tell us which one and lets share opinions about this quotes .. which is true & which is not
lets share our quotes
good bye
Saturday, September 29, 2007
باااااااااركولى كلكم .. انا اتخطبت :D
السلام عليكم ورحمة الله وبركاته
أكتب اليكم من موقعى هذا :D .... بوست متأخر حوالى شهر كاااااااااااااامل بس عموما اللى يعرفنى مش هيستغرب لانى معروف ان خطواتى فى العموم بطيئه شويه كمان بصراحه مكونتش ناوية انى اكتب فى البلوج تانى لانى من النوع اللى بيزهق بسرعه للاسف من اى حاجه بس فى المناسبه دى حسيت انى لازم اكتب
طبعا عارفنى كلكو .. انا الحمد لله وزى ما اغلب اصحابى عرفو
انا
انا
اتخطبت
:D :D
طبعا مفجأءه لكل اللى معرفش
عقبال كل البنات اللى نفسها تتخطب ربنا يحققلها حلمها وادعولى ربنا يتمملى على خييييييير يااااااااارب
Saturday, May 5, 2007
دروس فوتوشوب جاااااااااامده
طريقة عمل شريط سينيمائى
حول صورك الحديثه الى قديمه
إضافة تأثير ال xlight على النص
نص منفجر بشده
درس الكسوف
ادخل صوره على شكل
كيفية قص الصور
كيف تصنع كتابا
تشقيق الصفحه
دائرة ثلاثية الابعاد
هضيف لسه دروس تانى استنونى
سلام
Subscribe to:
Posts (Atom)
